Чекаат три неисплатени плати – наместо правда добиле судски трошоци од 20.000 евра

Кавадаречка тестилна компанија три години одбива да им исплати три заработени плати на околу 70 текстилни работнички. Тие ја тужеле компанијата, нo судот пресудил во корист на бизнисмените. Текстилните работнички сега треба да платат 20.000 евра за судски трошоци.

Седумдесетина конфекциски работници протестираа пред судот во Кавадарци, незадоволни од судска пресуда.

Во изјава за медиумите, тие рекоа дека биле вработени на неопределено време во текстилна фабрика до 23 февруари 2020 година, а фирмата им должела по три неисплатени минимални плати, придонеси од плата и други стасани парични побарувања од плата, во вкупен износ од 9.6 милиони денари, или, секој од нив побарувал по над 130 илјади денари.

Нивниот правен застапник, Даница Милкова изјави дека во подготовка е жалба на судската пресуда до Апелациски суд Скопје.

Според неа, имотот на текстилната фабрика бил продаден, а финансиски средства биле дадени како позајмица на семејна фирма на сопствениците на конфекцијата.

Поддршка добија и од претседателот на Здружението за заштита на работнички права „Гласен текстилец”, Кристина Ампева, којашто ги повика Управата за јавни приходи, Министерството за внатрешни работи, економски криминал, финансиска полиција и Основно јавно обвинителство, да го истражат случајот.

Од Основен суд Кавадарци најавија дека ќе се произнесат во понеделник.