Бугарската потпретседателка во посета на Голо Брдо пред пописот во Албанија

Потпретседателката на Бугарија , Илијана Јотова во наредните три дена ќе престојува во посета на Албанија во пресрет на националниот попис на населението.

Бугарските медиуми известуваат дека пописот е „значен момент за бугарското национално малцинство“ во Албанија откако беше признаено во 2017 година.

Јотова ќе присуствува на промоција на книгата на доцент професор Спас Ташев – „Бугарите во Албанија“, а најавена е и посета на селото Големо Острени, од регионот Голо Брдо. Според агендата, таа треба и да ја отвори новата учебна година во бугарското неделно училиште во градот Елбасан.

Во Тирана планирани се средби со претседателот Бајрам Бегај, со вицепремиерката и министерка за инфраструктура и енергетика Белинда Балуку, со претседателката на Собранието, Линдита Никола, со министерот за внатрешни работи Таулант Бала.

Во делегацијата предводена од Јотова се и професори од бугарските универзитети и од Бугарската академија на науките.