Бучавата во Центар ќе се мери со нови дигитални уреди

Општина Центар започна со инсталирање на 30 дигитални уреди за континуирано мерење на бучавата на најфреквентните локации во градот, со цел следење на нивото на звук и обезбедување податоци за брзо и ефикасно постапување.

Според градоначалникот Горан Герасимовски, досега се поставени 19 уреди.

– Овие сензори ќе ја следат бучавата во реално време и ќе алармираат кога ќе биде над дозволеното ниво. Со нив ги идентификуваме најпогодените точки и истовремено обезбедуваме материјал за нашите инспекциски служби – изјави Герасимовски.

Досега уреди се поставени во Дебар Маало, на улиците „Орце Николов“, „Мирослав Крлежа“ и „Отон Жупанчиќ“, како и на „Боемска 1“ и „Боемска 2“. Во наредните месеци, системот ќе се прошири со дополнителни уреди на улицата „Ленинова“, во населбите Капиштец и Буњаковец, на кејот 13 Ноември, кај Старата железничка станица и на Кале.

– Целта е да се покријат сите критични зони погодени од прекумерна бучава и да се обезбеди подобар квалитет на живот за граѓаните – соопшти Општина Центар.

Проектот претставува прва фаза од пошироката стратегија на општината за континуирано следење и намалување на бучавата, со користење современ софтвер за точно мерење во реално време. Јавноста ќе биде редовно информирана за активностите и воведувањето на дополнителни решенија за трајно справување со овој урбан проблем.