Бујар Османи кандидат за Чаир, Бајрам Реџепи за Тетово – ДУИ ги објави првите имиња
Поранешниот министер за надворешни работи и портпарол на Демократската унија за интеграција (ДУИ), Бујар Османи, ќе биде кандидат за градоначалник на скопската општина Чаир, како претставник на коалицијата Европски фронт.
За градоначалник на Тетово, кандидат ќе биде Бајрам Реџепи, кој исто така ќе настапи под капата на оваа коалиција.
Имињата беа официјално соопштени денеска, по завршувањето на 21. седница на Централното претседателство на ДУИ, која се одржа во Тетово.
Коалицијата Европски фронт, предводена од ДУИ, најави дека кандидатурите за градоначалници ќе бидат распределени меѓу сите партнери во коалицијата. Покрај ДУИ, свои кандидати ќе предложат и Алијансата на Албанците предводена од Зијадин Села, како и фракцијата на Алијансата под водство на Арбен Таравари.
Со овие најави, партиите од Европскиот фронт ја загреваат атмосферата пред претстојните локални избори, најавувајќи силна политичка битка за албанските општини.
