Брод за крстарење со 206 луѓе се насука на оддалечена локација на Гренланд
Брод за крстарење со 206 луѓе се насука на оддалечена локација во Источен Гренланд и не може да се ослободи, соопшти Заедничката арктичка команда (JAC) на данската војска.
Во соопштението се наведува дека луксузниот брод за крстарење „Ocean Explorer“ се насука вчера во Алпефјорд, во националниот парк, на околу 1.400 километри североисточно од главниот град на Гренланд, Нука.
JAC додава дека нема извештаи за повредени и дека нема директен ризик за луѓето во бродот или за околината.
„Најблиската помош е далеку, нашите единици се далеку, а времето може да биде многу неповолно“, рече началникот за операции на JAC, Брајан Џенсен.
JAC рече дека нејзиниот најблизок брод може да стигне до заглавениот крстосувач во петок наутро, на 15 септември.
Арктичката команда соопшти дека побарала уште еден крстосувач поблиску до Ocean Explorer да остане во областа за да помогне доколку ситуацијата се промени.
