Бретон: Европа ќе ја забрза испораката на оружје за Украина
Европската унија ја забрзува испораката на оружје за Украина за да ја поддржи контраофанзивата на земјата против руските сили, изјави европскиот комесар за индустрија Тиери Бретон во интервју за францускиот дневен весник Паризиен, пренесе Ројтерс.
„Ќе ги зголемиме нашите напори за снабдување со оружје и муниција – ова е војна со висок интензитет во која тие играат одлучувачка улога“, рече Бретон во врска со ветувањето за испорака на милион муниција од голем калибар во следните 12 месеци.
„Се подготвуваме војната да продолжи уште неколку месеци или уште подолго“, додаде тој.
Украина започна контраофанзива претходно овој месец за да ја врати контролата врз територијата заземена од руските сили, а американскиот секретар за одбрана Лојд Остин минатиот четврток ги повика сојузниците на Киев да вложат максимални напори за да обезбедат повеќе оружје и муниција.
