Димитриевски: Не смее да си дозволиме таков дефокус и пад на концентрација како со Украина!
Македонија гостува кај лидерот во „групата на смртта“, кој по три меча е максимален и посакува победа со која практично ќе исчекори кон пласманот на Еуро 2024 во Германија, па Димитриевски очекува меч во кој Македонија може да одговори на големиот предизвик.
„Треба да го дадеме нашиот максимум, а ако тоа го направиме и заедно со фокусот да биде на највисоко ниво ќе извадиме добар резултат, зошто да не и победа. Очигледно е дека заморот е голем, крај на сезона е, но ништо не мора да значи. Имаме одлична екипа со топ фудбалери кои може да одговорат на ваков предизвик и на вака високо ниво какво што нѐ очекува, само да го задржиме фокусот и концентрацијата на највисоко ниво. Само така може до поволен резултат“, вели Димитриевски.
Болниот пораз од Украина со 2-3 после наше водство од 2-0 е веќе минато, но Димитриевски посочива дека мора да се извлечат поуки за овој следен меч.
„Да, одигравме перфектно со Украина цели 60 минути, ама мечот трае 90 минути и мора да сме самокритични, зашто не останавме на високото ниво на концентрација во целиот меч. Тоа нѐ чинеше пораз. После тој пораз може само да продолжиме, нема изговори. Не смее да си дозволиме таков дефокус и таков пад на концентрација. Сега нѐ чека нов меч, ново докажување и можеби е подобро во минутажа да играме така добро во помал период, а цел меч да бидеме фокусирани и концентрирани. Така можеме до добар резултат, било реми или победа“, додава Димитриевски/
