Бизарно: Кардиф бара отштета од 120 милиони евра за смртта на фудбалер
Фудбалскиот клуб Кардиф ги проценува своите загуби на повеќе од 120 милиони евра во спорот со Нант за смртта на Емилијано Сала во авионска несреќа во 2019 година, потврди адвокатот на велшкиот клуб.
По анализата направена од правен експерт, „штетата на Кардиф се проценува на 120,2 милиони евра“, изјавила адвокатката Селин Џонс за Франс прес, со што ја потврдил информацијата која прв ја објави францускиот спортски весник Екип.
Оваа анализа овој понеделник официјално ќе биде доставена до трговскиот суд во Нант, кој треба да го одреди рокот за продолжување на постапката за овој случај.
Аргентинскиот напаѓач Емилијано Сала, на 28-годишна возраст, загина во јануари 2019 година во авионска несреќа над Ла Манш кога се префрлаше во својот нов клуб, Кардиф, на кого беше продаден од Нант. Никогаш не играл за клуб од Велс.
Кардиф смета дека Нант е одговорен за летот на кој патувал Сала и затоа поднел тужба до судот на Нант барајќи компензација за загубата на приходите и други штети што клубот ги претрпел поради смртта на аргентинскиот фудбалер.
Претходните проценки за оваа штета изнесуваа 100 милиони евра.
Во друга постапка поврзана со спортот меѓу двата клуба, Меѓународната фудбалска федерација (ФИФА) минатата година му наложи на Кардиф да му го плати на Нант остатокот од трансферот на аргентинскиот играч, во тоа време нешто повеќе од 11 милиони евра од вкупно 17 милиони.
