Битиќи ги прими синдикалните претставници на „Еуроникел“ на средба
Вицепремиерот за економски прашања Фатмир Битиќи се сретна со претседателот на синдикалната организација на „Еуроникел индустри“, Миле Ѓорѓиев, и Игор Ѓерасов, претседател на гранскиот синдикат на СИЕР, откако тие побараа средба со него за да се разговара за новонастанатата ситуација кај еден од најголемите македонски извозници.
Синдикатот на „Еуроникел индустри“ кој претставува 800 вработени во една од компаниите што создаваат најголеми приходи во земјата, претходно побараа средби со премиерот Димитар Ковачевски, но и со други релевантни институции, со цел да се најде решение за спас на комбинатот.
Синдикатот на ,,Еуроникел индустри” претходно со допис до директорот Димитрис Пасос и бордот на ГСОЛ, бара продолжување на производството во фабриката во Кавадарци. Печката само се грее, но не произведува, а вработените стравуваат за судбината на колективот.
„На состанокот синдикатот детално ја изнесе состојбата во која се наоѓа „Еуроникел индустри“. Вицепремиерот Битиќи потенцираше дека социјалниот дијалог е важен и дека тој во целиот свој мандат постојано повикува на истиот, затоа и се сретна и ги сослуша синдикатите, иако „Еуроникел индустри“ е фирма во приватна сопственост, како и дека верува во праведно и правично разрешување. Вицепремиерот даде поддршка во насока на почитување на обврските и правата и на двете страни кои произлегуваат од синдикалниот договор, како при секојдневното работење на компанијата така и при можната реорганизација, што ќе гарантира дека вработените во „Еуроникел индустри“ ќе добијат заштита.
„Еуроникел е важна за државата но и локалниот развој, за животот во Кавадарци и регионот, како и за вработените кои сакаат нивниот глас да биде чуен затоа што сакаат и имаат право да бидат заштитени, повикувајќи на солидарност и разумност при носењето на одлуките при реорганизацијата на компанијата.“, истакна вицепремиерот Битиќи
