Бислимовски: ЕСМ ќе купува струја од сите по иста цена како од Акуо Енерџи

Марко Бислимовски, претседателот на Регулаторната комисија за енергетика, денеска во Собранието пред пратениците рече дека во иднина АД ЕСМ ќе ја откупува електричната енергија од производителите на струја од обновливи извори по цена каква што е предвидена во договорот со стратешкиот инвеститор Акуо Енерџи.

„Со иницијативата до стопанската комора ќе се понудат иститите услови како за стратешките инвестори, односно тоа да важи и за македонските компании од страна на ЕСМ. Истата цена по која ЕСМ ќе ја откупува од Акуо Енерџи, да важи и за изградените фотоволтаични централи. Таа иницијатива ќе ја истераме до крај заедно со стопанската комора“, рече Бислимовски во Собранието каде што се дискутираше за финансискиот план на РКЕ.

Инвеститорот Акуо Енерџи ќе ја гради мегацентралата „Стипион“ во Штип, а според договорот,кој по скратена постапка преку посебен закон треба да се изгласа во Собранието, ЕСМ ќе биде должен да му ја купува електричната енергија по 56 евра од мегаватчас.