БИЛИНГВАЛНИ ИЛИ БЕЗ ПОЗНАВАЊЕ НА ЈАЗИК: Агенциите регрутираат сезонци за летово
Билингвални или
без познавање на странски јазик, агенциите почнаа да регрутираат сезонци за ова
лето за работа во Грција, Хрватска, Словенија.
Познавањето на
англискиот јазик е задолжително, а лицата со турски, италијански и германски
јазик се добредојдени. Ако знаат и грчки, уште подобро, стои во еден од огласите
објавени на интернет за работа во Грција. Се нудат работни позиции на островот
Кос во Грција, во Порторож во Словенија, Пула, Риека, Пазин, Сплит, Солин,
Шибеник и многу други места низ Хрватска. Агенциите бараат собарки, келнери,
готвачи, работници за во складишта, возачи, пица мајстори, продавачи,
градинари, хаус мајстори, салатери, масери и други профили. Има голем избор на професии. Во дел од огласите е
наведено дека освен плата има стимулација
во вид на бонуси. Бараат комуникативни и одговорни луѓе. За повеќето работни
места се бара работно искуство или искуство на некоја слична позиција.
„Расте интересот за работа во
странство, најмногу за Хрватска. Имаат добри услови, нудат сместување, храна,
превоз, флексибилни се“, велат од скопска агенција.
Луѓето кои работат во овој сектор и се упатени во огласите за работа во
странство, велат дека Чешка ја имавме лани, како земја која бара работници од
Македонија, но сега доминираат државите од регионот.
„Србија поретко има огласи. Црна Гора знаете дека бара работници за во
хотелите, а Чешка бараше луѓе за работа во фабрики. Трошоците за живот се покачени,
инфлацијата доведе до таа ситуација и луѓето се пресметуваат. Во Италија лани бараа медицински сестри.
Курири бараа за во Бугарија. Хрватска е најприфатлива за нашите работници. Луѓето
планираат барем 50 отсто од заработката да им остане, парите да ги донесат тука.
Секој гледа да заработи повеќе и да си донесе дома повеќе пари. Работодавачите
најчесто бараат помлади личности кои веќе работеле во матичната држава“, вели
наша соговорничка.
За Хрватска обично се нуди сместување
на трошок на работодавачот и 2 оброка дневно. За работа
на островот Кос пак кај јужниот сосед е наведено дека платата е 1.400 евра плус бакшиш. Во регионот секое лето се потребни илјадници
сезонци за да ги пополнат празните работни места.
Сања Атанасовска
foto freepik.com
