Бебињата родени во пандемијата развија „фасцинантна“ заштита
Научниците откриваат значителни разлики во развојот на цревниот екосистем на доенчиња родени кога имало ограничувања за физичко растојание, во споредба со бебињата родени пред коронавирусот.
Изолацијата воведена за време на пандемијата на Ковид доведе до промени кај новороденчињата кои можеби ги заштитиле од алергии, покажува новото истражување, пишува Sky News .
Ирските научници открија дека бебињата израснати кога имало ограничувања како физичко растојание поради коронавирусот, имаат повеќе корисни микроби стекнати од нивните мајки по раѓањето, што може да дејствува како одбрана од болеста.
Научниците веруваат дека ова доведе до тоа „бебињата во пандемија“ да имаат помалку алергиски состојби, во споредба со бебињата пред Ковид.
Наодите, објавени во списанието Алергија, ги истакнуваат придобивките за здравјето на цревата за младите луѓе како резултат на изолацијата за време на Ковид-19, вклучително и пониски стапки на инфекција и последователна употреба на антибиотици и подолго времетраење на доењето.
Екосистемот на природни бактерии во цревата, познат како микробиом, игра клучна улога за здравјето на луѓето. Истражувачите анализирале примероци од столицата на 351 бебе родено во првите три месеци од пандемијата, споредувајќи ги со групата пред пандемијата.
Примероците од столицата се земени на возраст од шест, 12 и 24 месеци, а алергиско тестирање е направено на возраст од 12 и 24 месеци. Студијата истакна значајни разлики во развојот на микробиомот на бебињата родени во периодот на карантин во споредба со бебињата родени пред пандемијата.
Истражувањето покажа дека само околу пет проценти од бебињата во изолација развиле алергија на храна до првата година, во споредба со 22,8 проценти во групата пред Ковид. Помалку инфекции поради неизложеноста на бактерии ја намалија и потребата од антибиотици, кои ги убиваат добрите бактерии, пренесува N1 Загреб.
Само на 17 отсто од бебињата од изолација им биле потребни антибиотици до својата една година. Во групата пред пандемијата, 80 проценти од доенчињата земале антибиотици до 12 месеци.
