Банката на ЕУ се надева дека Арсовска и Водовод наскоро ќе го потпишат фамозниот тендер за пречистителна станица во Скопје
Денеска беше потпишан договорот за грант од ЕУ со Европската инвестициска банка, финансиерот на изградбата и надзорот на пречистителна станица за отпадни води во Скопје.
Договорот го потпишаа вицепремиерот за европски прашања Бојан Маричиќ, министерот за финансии Фатмир Бесими, министерката за животна средина и просторно планирање Каја Шукова, евроамбасадорот Дејвид Гир и заменик претседателката на ЕИБ Лилјана Павлова.
На прес-конференцијата беше кажано дека сега се очекува соработка од градоиначалничката на Скопје, Данела Арсовска, и јавното претпријатие Водовод и канализација да го потпише договорот со изведувачот на изградбата и надзорот на оваа исклучително скапа капитална инвестиција.
Токму поради тендерот за пречистителна станица Арсовска се скара со ВМРО-ДПМНЕ, со чија поддршка стана градоначалничка на Скопје. Арсовска во септември го разреши од функција директорот на Водовод Златко Перински, бидејќи имала сомнеж дека го мести тендерот. Разрешувањето беше во време кога се вршеше евалуација на понудите. Перински ги негираше ваквите наводи на Арсовска, потенцирајќи дека Арсовска со своето мешање може да го загрози тендерот за реализација на пречистителната станица.
Арсовска и Марјан Митовски, новиот в. д. директор кој таа потоа го постави, оттогаш не даваа никакви информации до каде е постапката. Во меѓувреме си замина и Митовски од оваа институција.
– Јас се надевам дека ќе ги надминеме недоразбирањата. Разговарав со Арсовска и ќе ги утврдиме наскоро термините кога да бидат потпишани овие договори, изјави министерката Шукова денеска пред медиумите.
Постапката за пречистителна станица за отпадни води започна во декември 2019, кога беше потпишан договорот за заем. Тендерот беше распишан во јуни 2020 и тогаш беше кажано дека ќе биде готова во 2025.
На денешната прес-конференција беше кажано дека постапките се завршени, но без потпишан договор со понудувач. Договорот за изградба и надзор треба да го потпише скопски Водовод.
– Она што можам да го кажам е дека ние мора да следиме посебни правила и процедури и вршиме надзор со вонредни и редовни контроли на процесот на оваа јавна набавка, но се мина како во добар ред и има зелено светло за Водовод да го потпише договорот, рече Павлова од Европската инвестициска банка.
Пречистителната станица за отпадни води ќе се простира на површина од 13 хектари, во општина Гази Баба, на левиот брег на реката Вардар, во областа Трубарево и ќе биде со капацитет за 500.000 жители.
Во финалната фаза влегоа две компании/конзорциуми со своите понуди. Според претходни медиумски натписи блиски до опозицијата, Арсовска ја фаворизирала турската фирма.
Пречистителна станица Скопје, една од најголемите инвестиции за инфраструктурен проект за заштита на животна средина во земјава, која трајно ќе го реши третманот на отпадните води од градот Скопје и ќе има големо влијание врз заштитата на животната средина, може да почне да се реализира. Обезбедени се 136 милиони евра од Европската инвестициска банка (ЕИБ) и од Европската банка за обнова и развој (ЕБРД).
