Австралија: Најмалку петмина загинаа во најлошите поплави во последните години
Властите во Австралија денес започнаа со работа за санирање на штетите предизвикани од разорните поплави во југоисточниот дел од земјата.
Лошото време предизвика смрт на најмалку пет лица.
Службите за итни случаи во државата Нов Јужен Велс соопштија дека продолжуваат да ја проценуваат штетата од поплавите што го зафатија регионот во последните денови. „Првичните проценки покажуваат дека најмалку 10.000 имоти се оштетени поради невидените поплави“, се вели во соопштението за медиумите.
Условите се подобрија од петокот во погодените области на најнаселената држава во Австралија. Сепак, стотици жртви од поплавите остануваат во објектите каде што побарале засолниште, изјави шефот на службата за управување со вонредни состојби Мајк Вошинг на прес-конференција во Сиднеј. Како што рече тој, само синоќа биле спроведени 52 спасувачки операции.
Бројот на жртви се зголеми откако 80-годишен маж беше пронајден мртов во поплавена куќа на околу 50 километри од Тари, еден од градовите најтешко погодени од поплавите, соопшти полицијата.
Премиерот Ентони Албанезе, кој беше принуден да ја откаже посетата на Тари во петокот поради поплавите, рече дека е „страшно да се чуе веста за уште повеќе загуби на животи“.
Поројните дождови предизвикаа излевање на реките, поплавувајќи огромни области, заробувајќи приближно 50.000 жители, од кои многумина се засолниле на покривите на зградите додека чекале помош од спасувачките екипи.
Австралија е погодена од екстремни временски настани во последните години. По сушата и разорните пожари на крајот од претходната деценија, тешките поплави предизвикаа хаос од почетокот на 2021 година.
