Тешка несреќа на патот Прилеп–Градско: Камион излетал од пат и удрил во ограда, загина 42-годишен маж!
Едно лице го загуби животот во тешка сообраќајна несреќа што се случи синоќа околу 22:30 часот на експресниот пат Прилеп–Градско, пред приклучокот за автопатот Неготино–Велес.
Според информациите од Министерството за внатрешни работи, товарно возило „рено мастер“ со регистарски ознаки од Крива Паланка, управувано од 42-годишниот А.Ѓ. од Крива Паланка, излетало од коловозот и удрило во заштитна ограда.
По првиот инцидент, друго товарно возило од марката „ман“, управувано од 44-годишниот М.В. од селото Трубарево, скопско, се обидело да го избегне веќе излетаното возило, по што и тоа излетало од патот и удрило во метална ограда.
Во несреќата со тешки телесни повреди се здобил возачот на возилото „рено мастер“. Тој веднаш бил пренесен во Општата болница во Велес, но, за жал, им подлегнал на повредите околу 01:30 часот по полноќ.
По наредба на јавен обвинител, телото на починатиот е предадено во Институтот за судска медицина за обдукција. Увид на местото на несреќата извршила екипа од СВР Велес.
