Атовска за известувањето од војната во Украина: Веројатно најдисциплинираната задача во мојата кариера, не смеете да си дозволите разболување или повреда!
Новинарката Кристина Атовска, која двапати известувала од Украина, во гостувањето на 4TV.mk го опиша денот во животот на еден новинар во воена зона и предизвиците со кои се соочуваат медиумските работници.
„Фокусот на работата е најважен“, рече Атовска, додавајќи дека известувањето од војна е „веројатно најдисциплинираната задача“ во нејзината 23-годишна кариера.
„Не смеете да се разболите, не смеете да бидете повредени – тие ресурси се потребни на други места, докторите се на фронтовите, а најмала настинка или повреда може да значи животна опасност“, вели таа.
Таа истакна дека дисциплината е витална и во телото и во умот.
„Мора да се храните и да спиете доволно, иако тоа понекогаш изгледа невозможно, особено во градови како Харков каде бомбите паѓаат беспрестано. Дисциплината овозможува да останете здрави и способни за работа“, порача Атовска.
Покрај физичката и менталната дисциплина, Атовска нагласи и важноста на емоционалната контрола: „Кога излегуваме надвор, се соочуваме со луѓе кои го изгубиле сè – домови, семејство, нормален живот. Мораме да ја оставиме личната емоција на страна и да се фокусираме на новинарската задача, сè додека не дојде моментот за одмор, кога можеме да ги процесираме приказните што сме ги снимиле.“
Таа потенцира дека новинарите мораат да најдат тенка линија помеѓу објективното известување и почитувањето на емоциите на жртвите.
„Тоа е многу тешка задача – да ја пренесеш вистината без да се премине во сензационализам, со чувство на одговорност кон луѓето чии животи ги раскажуваме.“, вели Атовска за 4TV.mk
