Љатифи Азизи: Во наредните две недели се очекува половина од пациентите кои моментално се лекуваат во странство да се вратат во земјава
На денешната прес-конференција портпаролката на Владата, Венера Љатифи Азизи, соопшти дека според најновите податоци, денеска од болниците ќе бидат отпуштени 16 пациенти кои досега се лекувале во земјава и ќе го продолжат лекувањето во домашни услови.
Таа нагласи дека во наредните две недели се очекува половина од пациентите кои моментално се лекуваат во странство да се вратат во земјава, при што Владата презема сите неопходни мерки за нивната понатамошна медицинска нега.
-Во меѓувреме, состојбата на некои пациенти и понатаму е сериозна. Четири од тие кои се во странство се во критична состојба, но правиме се за да го обезбедиме потребниот третман и да се надеваме на нивно подобрување. Покрај болничката нега, како дел од долгорочната нега обезбедивме тим хирурзи кој ќе остане во Кочани за поддршка на пациентите кои се лекуваат дома избегнувајќи ги нивните напорни патувања во клиниките. Исто така, штипската болница располага со четири хирурзи кои ќе бидат во постојана комуникација за давање поддршка на пациентите, рече таа.
Таа информираше дека во моментот, во странство се лекуваат 116 пациенти, а се очекува во текот на оваа недела осум од нив да се вратат и да продолжат со лекување во земјава.
