Арсовска: Ме саботираат затоа нема резултати, оставка од мене нема да видат, ќе се борам до крај
Од мене оставка тие нема да видат токму затоа што ја сакаат и ја бараат. Ова вечерва во емисијата Топ тема на ТВ Телма го изјави градоначалничката на Град Скопје, Данела Арсовска.
Многу е тешко кога имате две најголеми политички партии во македонија, кои што имаат само еден заеднички непријател во овој момент. Мое лично мислење е дека тие се фокусираат да прават хаос низ градот Скопје и да не ги гласаат проектите затоа што сакаат да ја дефокусираат јавноста од вистинските проблеми во државата, а тоа е како здружено да го сменат Уставот, но тоа е друга тема. Оваа тема е, доколку сакаат да се реализираат, тие треба да гласаат во тој совет, а јас како знам и умеам ќе ги реализирам сите оние проекти кои што ги имам ветено пред граѓаните, рече Арсовска.
Таа е децидна дека оставка нема да даде во никој случај и дека ќе за бори до крај, затоа што била во право.
На прашање дали е спремна сите заедно (со советниците) да си дадат оставка, таа одговори дека такво нешто од неа нема да видат.
„Апсолутно не, од мене оставка тие нема да видат токму затоа што ја сакаат и ја бараат. Знаете ли зошто? Затоа што јас сум во право, а тие не се. И ако мислите дека јас како поединец ќе издржев 18 месеци притисоци од вакви политички партии и елити кои успеале да се пресметуваат и меѓу себе и со трети страни, а да не сум во право, се лажете“,рече Арсовска.
На прашањето зошто вчера на седница на Советот го нарекла лидерот на ВМРО-ДПМНЕ Христијан Мицкоски „Рекет број 1“, одговори дека „нема потреба да ги образложува метафорите кога на два милиона граѓани тоа им е јасно“.
