Апостолоски по ревизорскиот извештај за СЦ „Борис Трајковски“: Се исправаат неправилности од минатото, институциите да си ја завршат работата
По објавата на извештајот на Државниот завод за ревизија за работата на СЦ „Борис Трајковски“ за 2023 година, директорот на спортскиот центар, Даниел Апостолоски, јавно се огласи со појаснување за утврдените неправилности и за чекорите кои ги презема актуелното раководство.
Апостолоски посочува дека голем дел од забелешките наведени во ревизорскиот извештај потекнуваат од периодот на претходните раководства, и дека по преземањето на функцијата, дел од нив веќе се адресирани, додека остатокот ќе биде решен до крајот на оваа година.
„Многу од забелешките ги идентификував и самиот уште при првите месеци од работењето. Постапивме по нив, а таму каде што сè уште има заостанати прашања, активно работиме на нивно решавање,“ вели Апостолоски.
Посебно внимание привлекуваат трошоците направени при организирањето на ОБСЕ самитот, за кои, како што истакнува директорот, од страна на центарот била побарана соодветна документација од Министерството за надворешни работи, која сè уште не е доставена. И покрај тоа, материјалните добра останале во сопственост на центарот, а по ревизијата бил извршен и комплетен нов попис.
Во однос на платите, Апостолоски најавува заложби за нивно регулирање, посочувајќи дека висината на личните примања на вработените не се променила уште од 2016 година, освен во делот на минималната плата.
Што се однесува до Аква паркот, тој е категоричен дека објектот не бил соодветно одржуван, што резултирало со сериозни проблеми.
„Работиме на долгорочно решение, со цел Аква паркот конечно да профункционира без прекини. Целиме тој да биде целосно подготвен за работа веќе за следната летна сезона,“ изјави директорот.
Апостолоски се осврна и на прашањето со паркингот, кој иако претставува сериозен потенцијален приход за спортскиот центар, засега останува бесплатен. За идни чекори, вели, ќе се бара консензус со градските власти и граѓаните.
На крајот, директорот ја повикува и надлежната институционална структура да ги разгледа сите утврдени неправилности.
„Стојам на располагање за соработка и целосно расчистување на сите спорни сегменти од работењето во 2023 година,“ порача Апостолоски.
