Масев призна вина – адвокатот тврди Штекли не е способен да следи рочиште, страдал од шизофрено раствојство, а имал и халуцинации!
На денешното рочиште за случајот „Штекли“, поврзан со организирана трговија со дрога во скопската населба Аеродром, судскиот процес доби нова димензија поради психичката состојба на еден од главните обвинети – Раде Трајковски, познат како Штекли.
Судијата Илија Трпков информираше дека одбраната поднела психијатриско вештачење според кое Трајковски страда од растројство со шизофрени карактеристики, има халуцинации, параноидни идеи и не е способен да ја следи постапката. Наспроти тоа, Обвинителството достави спротивен извештај, во кој се тврди дека тој е апсихотичен и целосно способен за учество во судењето.
Поради спротивставените мислења, Судечкиот совет донесе одлука да ги соочи вештите лица од двете страни на наредното рочиште, закажано за 3 септември. Судијата Трпков додаде дека Судот тогаш ќе процени дали ќе даде предност на едно од постоечките вештачења или ќе нареди изготвување на ново.
Во истата постапка, четворица обвинети – меѓу кои и поранешниот директор на А фудбалската репрезентација, Данчо Масев, како и Димитар Трајков, Владимир Веселиновски и Бранислав Зајков – признаа вина, по што Судот ја раздвои постапката за нив.
Обвинението, поднесено од Обвинителството за гонење на организиран криминал, опфаќа вкупно 10 лица, а се темели на речиси едногодишна истрага со посебни истражни мерки, при што биле користени алатки како системот „Cellebrite“ за анализа на мобилни телефони, донација од САД.
Групата, според обвинителството, била добро организирана и структурирана, со јасна поделба на улоги – од набавка до улична продажба на дрога, која се чувала во изнајмени станови. Кокаинот се продавал по 4.500 до 6.000 денари за грам, а марихуаната по 200 до 300 денари.
Случајот го привлече вниманието на јавноста и поради вклученоста на познати личности и се очекува да продолжи со засилено медиумско следење по есенската пауза.
