Англиските одгледувачи нудат „пријателство“ со кравите за борба против стресот
Неодамна, многу посетители доаѓаат од далеку на фармата Дамбл во северна Англија не затоа што сакаат да купат сирење и млеко таму, туку да ја галат или да ја четкаат кравата Мораг или некој од нејзините „пријатели“ од стадото.
Фиона Вилсон и нејзините партнери од фармата почнаа да нудат нови содржини на посетителите во февруари кога стана јасно дека нивните економски проблеми нема да исчезнат наскоро.
„Некои луѓе сакаат контакт со кучиња, други со мачки или коњи, а има и такви кои сакаат да се „дружат“ со крави“, изјави Фиона Вилсон за АФП, објаснувајќи дека луѓето всушност „доаѓаат заради сопствената благосостојба. Научно е докажано дека близината на овие големи домашни животни ја ублажува анксиозноста кај многумина и делува речиси како терапија“.
Сопствениците на Дамбл Фарм, во близина на Беверли во Источен Јоркшир, како и многу други фармери, се тешко погодени од остриот пад на цените на млекото и од неодамна високата инфлација. Десетици илјади лозари го напуштија овој сектор во последните неколку децении.
Според официјалните податоци од библиотеката на Долниот дом на британскиот парламент, во 1950 година имало 196 илјади фарми кои произведувале млеко во Обединетото Кралство, но до 1995 година само 35.700 од нив останале активни.
Падот на цените на млекото и зголемувањето на трошоците за енергија, гориво, сточна храна и ѓубрива, по избувнувањето на војната во Украина во февруари 2022 година, ја запечатија судбината на многу фармери. Бројките на Одборот за развој на земјоделството и градинарството, британската асоцијација на фармери, велат дека до октомври 2023 година во Британија ќе останат само 7.500 млекарници.
Освен тоа, сопствениците на фармата Дамбл во последните седум години шест пати се соочиле со поплави, поради што со месеци била под вода.
Сфаќајќи дека нивните трошоци се поголеми од нивните приходи, Фиона и нејзините партнери одлучија во јануари 2022 година да го продадат своето стадо и да започнат друг бизнис.
Тие чувале пет крави, кои не можеле да ги остават. „Ги сметавме, и така мислиме и денес, нашите пријатели. Тие се толку пријателски расположени и шират еден вид мир околу себе“, објасни Фиона Вилсон.
„Токму поради овој мир, мислевме дека можеме да им понудиме и на посетителите престој со кравите, што ќе ни овозможи да заработиме малку повеќе, а исто така ќе ги заинтересираме луѓето за тоа што всушност правиме овде“.
