Ангелов: Еден ер трактор на ДЗС успешно дејствуваше во повеќе налети врз пожарот до Преспанско езеро, додека вториот ер трактор врз пожарот кај Желино и Еребино
Еден авион ер-трактор на Дирекцијата за заштита и спасување (ДЗС) успешно дејствуваше попладнево со повеќе налети врз пожарот кој беснее во близина на Преспанското Езеро, додека вториот ер-трактор беше ангажиран на фронтот кај Желино и селото Еребино, каде огнената стихија зафати голема површина од сува вегетација и нискостеблеста шума, инфомираше директорот на ДЗС, Стојанче Ангелов.
Покрај авионот, во акцијата за гаснење на пожарите е вклучен и полициски хеликоптер кој интервенира во прилепскиот регион, каде огнот се шири околу селата Штавица, Чумово, Волково и Прилепец. Ситуацијата таму е и понатаму сериозна поради тешко пристапниот терен и силниот ветер кој го разгорува пламенот.
Кон оваа критична зона е упатен и еден хеликоптер на Армијата на Северна Македонија, кој ќе се приклучи на гаснењето од воздух со цел да се спречи понатамошно ширење на пожарот и да се заштитат населените места.
-Нема опасност по куќи и други објекти, на терен има доволно ПП екипи како и локално население, вели Ангелов.
Институциите остануваат на терен и апелираат граѓаните да бидат крајно внимателни и да не предизвикуваат дополнителна опасност, имајќи предвид високите температури и ризикот од нови пожари.
