ЈАНЕВСКА ВО МАНУ: Критериумите за професорите мора да се кренат, квалитетот е драстично опаднат по 2018 година
Новиот Предлог-закон за високо образование мора да воведе повисоки критериуми за напредување во академски звања со цел да се спаси квалитетот на образованието. Ова е главната порака што министерката за образование и наука, Весна Јаневска, ја упати на денешната дебата посветена на законските реформи, одржана во Македонската академија на науките и уметностите (МАНУ).
Најголемите полемики во јавноста и во академската заедница се водат токму околу заострувањето на условите за напредување на универзитетските професори. Јаневска појасни дека иако новите критериуми се сè уште пониски од европскиот просек, тие претставуваат неопходен чекор напред.
Министерката потсети на основната функција на универзитетите – создавање јавно добро, интелигенција и стручни, морални личности кои ќе го движат општеството напред. Но, паралелно со тоа, државата како финансиер очекува јасни резултати.
Според неа, новиот закон нуди меритократија, интернационализација и мотивација за научноистражувачка работа, која е неделива од образовниот процес.
Предлог-законот не е конечен и остава простор за доработка врз основа на сугестиите од фелата.
Дополнително, Јаневска информираше дека од вчера за јавноста е достапен и новиот Предлог-закон за научно-истражувачка дејност.
