Јаневска: Студентскиот оброк останува 140 денари

За време на посетата на „Саемот за образование“ во организација на студентската иницијатива „Студентарија“, министерката за образование и наука Весна Јаневска информира дека работат на законот за студентски стандард и дека студенскиот оброк ќе остане 140 денари, но, ќе се прошири опсегот и ќе опфати повеќе студенти.

На прашањето дали ќе има измена на моделот на студентскиот оброк и во кој правец се размислува, Јаневска одговори потврдно.

– Да, се планира, во овој момент работиме на законот за студентски стандард. Според дописот што го имаме добиено од студентите, студенскиот оброк ќе остане 140 денари, но, ќе се прошири опсегот и ќе опфати повеќе студенти, информираше Јаневска, за време на посетата на „Саемот за образование“ во организација на студентската иницијатива „Студентарија“.

Јаневска соопшти и дека реновирањето на студентскиот дом „Пелагонија“ ќе почне откако ќе бидат завршени двата дома што сега се разубавуваат.

– Реновирањето на домовите мора да оди постепено за да можеме да ги сместиме студентите кои сакаат да студираат во Скопје. Затоа, откако ќе бидат завршени двата што се започнати, ќе почне реновирањето и на „Пелагонија“, одговори таа на новинарско прашање.