Андоновски: Се модернизира системот за интегрирано планирање на ресурсите
Системот за интегрирано планирање на ресурсите (ИПР), кој цели две години не бил одржуван, од јануари годинава е предмет на интензивни активности за негово подобрување, изјави денеска министерот за дигитална трансформација, Стефан Андоновски.
„Внимателно ги следиме забелешките на Државниот завод за ревизија и работиме согласно нив. Целта е да добиеме систем на кој можеме да му веруваме и кој ќе биде достапен и за институциите надвор од Службата за општи и заеднички работи (СОЗР), како што се агенции и општини, кои сè уште голем дел од материјално-финансиското работење го водат хартиено,“ изјави Андоновски.
Министерот појасни дека системот е веќе ставен во функција, а поединечните модули ќе се објавуваат во јавноста како што ќе се развиваат.
„По склучувањето на договорот во јануари започнавме со акциски план за отстранување на сите слабости. Веќе се извршени безбедносни тестирања и заштита на податоците и на корисниците, а во тек е и поврзувањето со официјалните службени мејл-адреси. Со завршувањето на овој пакет, ќе добиеме стабилен систем, кој ќе може да го користат сите институции,“ нагласи Андоновски, одговарајќи на новинарско прашање по отворањето на новата канцеларија за административни услуги во општина Свети Николе.
Тој најави и дека ИПР-системот ќе биде интегриран со трезорското работење. „Оваа недела го тестиравме во нашето Министерство. Нашите вработени веќе самостојно прават пресметки, без посредство на сметководителите од СОЗР. Целта е секое министерство и институција да може директно да работи во системот и на тој начин да се оптимизира процесот,“ изјави министерот.
Во најновиот извештај, Државниот завод за ревизија констатира дека системот кој треба да го следи финансиското работење на 40 државни институции не се одржувал редовно, при што не било обезбедено целосно дигитално следење на сметководствено-финансиските услуги, вклучувајќи и десет министерства преку кои минуваат речиси 19 проценти од државниот буџет.
