Американски сенатор и ветеран: Не смееме да се откажеме од Украинците – Маск му врати: Ти си предавник
Американскиот демократски сенатор Марк Кели ги сподели своите впечатоци по посетата на Украина.
„Само што ја напуштив Украина. Она што го видов ми покажа дека не можеме да се откажеме од украинскиот народ. Сите сакаат оваа војна да заврши, но секој договор мора да ја заштити безбедноста на Украина и не може да биде отстапка за Путин“, напиша Кели на X.
Милијардерот Илон Маск, сопственик на Х, близок соработник на Доналд Трамп и поборник за прекин на помошта за Украина, му одговори на Кели нарекувајќи го „предавник“.
„Предавник? Илон, ако не разбираш дека одбраната на слободата е основниот принцип на она што ја прави Америка голема и што не чува безбедни, можеби треба да го оставиш тоа на оние од нас што го разбираат“, му рече Кели.
Кели е пензиониран астронаут и поранешен воен пилот кој учествувал во Заливската војна.
Коментарите доаѓаат во време на навестувања за можни разговори на САД со Русија за мир во Украина. Администрацијата на Трамп врши притисок врз Украина да потпише договор за минерали и да се согласи да преговара со Русите, додека Киев бара силни безбедносни гаранции од Америка.
