Алкараз: Јас си ја завршив работата, сега на ред се фудбалерите на Шпанија!
Шпанецот на можеби најдобриот на сите времиња му го нанесе еден од најтешките порази во кариерата и тоа откако противникот спаси три меч топки во финишот на третиот сет.
„Тешко ми беше да останам смирен и концентриран после ситуацијата кога пропушти 40:0 на свој сервис за победа, но сетот отиде во тај-брејк каде што се обидов да го играм мојот најдобар тенис. Среќен сум што успеав да го направам тоа, што ме доведе во оваа ситуација“, изјави шампионот на Вимблдон.
Тој е само шестиот тенисер кој ги освоил Ролан Гарос и Вимблдон во иста година.
„Само се борам и верувам во себе, не знам што друго да кажам, одлична работа е да се биде во друштво на играчи кои ги освоија овие турнири во иста година бидејќи не се сметам себеси за голем шампион. Сепак, се трудам да продолжам да одам по мојот пат и да ја градам кариерата најдобро што можам“, дополни Алкараз.
Тој сега смирено ќе може да го гледа финалето на фудбалското ЕП, во кое неговата Шпанија ќе ги одмери силите против Англија во Берлин.
„Јас си ја завршив работата, сега нека го сторат тоа и фудбалерите. Сигурно ќе биде тежок натпревар и се надевам дека подобра екипа ќе ја освои титулата“, заврши Шпанецот.
