Алкалоид ги промовира четирите нови засилувања за Европската лига!
Нови ракометари на „фармацевтите“ се репрезентативецот на Македонија, десниот бек Мартин Велковски, младиот пикер Стефан Стојчевиќ, а за првпат во екипата ќе има и интернационалци – левото крило Арно Бинго од Франција и голманот од Куба, Алехандро Ромеро.
Бинго ќе биде најискусниот во тимот од Автокоманда, барем според неговата биографија. Тој има 35 години и е поранешен репрезентативец на Франција, а во кариерата настапувал за португалските екипи Бенфика и Спортинг, како и за француските Трембле и Монпелје. Ромеро, пак, е роден во 1994 година, а доаѓа од Екс Провaнс, во чии редови имаше завиден процент на одбрани. Кубанецот бранеше и за Понто Комбо од Франција, за шведскиот клуб Онередс Аристика и за Порто.
Велковски е 26-годишен десен бек, кој доаѓа од Пелистер, а претходно настапуваше и за Металург. Тој беше дел од македонската репрезентација на ЕП во Хрватска во 2018, на ЕП во Австрија во 2020, на СП во Египет во 2021 и на ЕП во Унгарија во 2022. Стојчевиќ е кружен напаѓач, кој има 20 години и кој е висок 207 сантиметри, а доаѓа од Бутел Скопје.
Стручниот штаб на Алкалоид се надева дека со овие четворица нови ракометари тимот ќе добие повеќе искуство на теренот, проверен квалитет и опции за игра и воедно ќе стане поконкурентен за настапите во домашната Суперлига и во Европската лига.
