Алиу: Предлог-законот за заштита од пушењето не е рестриктивен, тој е европски – намерата не е казнување, туку превенција!
Министерството за здравство објави дека предлог-законот за заштита од пушење, кој се очекува да стапи на сила на 1 март, не е рестриктивен, туку целта му е усвојување на европски стандарди за јавно здравје. Министерот за здравство, Азир Алиу, истакна дека законот не е насочен кон казнување, туку кон превенција и заштита на најранливите категории граѓани.
„Предлог-законот е усогласен со меѓународните стандарди и целта е унапредување на јавното здравје. Тој не е рестриктивен, туку европски. Европските стандарди за заштита на здравјето се воспоставени во овој закон. Според податоците од Светската здравствена организација, над 45 проценти од возрасната популација пуши, што ја става нашата земја меѓу земјите со највисока стапка во Европа“, нагласи Алиу.
Предлог-законот е објавен на Електронскиот национален регистар на прописи (ЕНЕР), каде граѓаните и организациите можат да учествуваат во јавната расправа пред неговото усвојување.
Законот предвидува забрана за електронски цигари со вкусови, како и забрана за пушење во автомобили во присуство на дете. Граѓаните кои ќе ги прекршат одредбите можат да добијат казна до 300 евра. Дополнително, се воведува целосна забрана за рекламирање, промоција и спонзорство на тутунски и никотински производи, а продажбата и изложувањето на овие производи се ограничува како превентивна мерка за поддршка на откажувањето од зависноста.
„Освен забрана за пушење во јавни институции и на јавен простор, законот предвидува и рестрикции во дигиталниот простор за да не се промовираат штетни производи, особено меѓу младите“, објасни Алиу.
Министерот истакна дека донесувањето на законот ќе придонесе за намалување на бројот на пушачи и на трошоците за лекување на заболувања предизвикани од пушењето. Паралелно со законските измени, Министерството за здравство ќе спроведува програма за едукација и информации за штетноста на тутунот, со акцент на младите.
„Целата 2026 година ќе биде поврзана со имплементација на законот и едукација за здравствените ризици, особено кај младите во нашата држава“, нагласи Алиу.
Со новите мерки, државата се обидува да ја зајакне заштитата на граѓаните од штетните ефекти од тутунот и никотинските производи и да обезбеди здрава животна средина за сите.
