Александар Сарџовски нов директор на снабдувачот со електрична енергија ЕДС
Александар Сарџовски е назначен за нов главен извршен директор на еден од најголемите снабдувачи и трговци Енерџи Деливери Солушнс АД, инаку во сопственост на грчкото електростопанство.
Сарџовски досега беше познат како директор на секторот продажба кај телекомуникацискиот провајдер А1 Македонија.
Тој ќе го менува Милтиадис Бампилис од Атина, инаку искусен менаџер од енергетскиот сектор во Грција, кој 18 години претходно бил на менаџерски позиции во Шел, а 10 години во Хеленик Петролеум.
ЕДС e водечка македонска компанија од областа на трговија со електрична енергија и една од ретките што има развиена мрежа за снабдување со електрична енергија и искуство во набавка на струја на слободен пазар. ЕДС е членка на меѓународната берза за набавка на струја, ги снабдува со струја големите индустриски капацитети, а поголем дел и од претпријатијата со средна големина, како и некои државни институции.
