Алабама: Осуденик за прв пат погубен со азотен гас
Во американската сојузна држава Алабама за прв пат беше погубен осуденик користејќи азотен гас, што таа држава во САД го нарече „најбезболен и најхуман метод на егзекуција досега“, додека противниците тврдат дека методот е суров и експериментален.
Кенет Смит, 58-годишен маж, осуден за убиство, е убиен во четвртокот вечерта, изјави гувернерот на Алабама Кеј Ајви, пренесува Танјуг, цитирајќи го Ројтерс.
Тој беше прогласен за мртов во 20:25 часот по локално време во затвор во Алабама.
На Смит му била ставена маска и преку неа вдишал чист азотен гас, предизвикувајќи недостаток на кислород.
Најчесто користена смртоносна инјекција
Досега најкористен метод на егзекуција во САД е смртоносната инјекција, која е воведена во 1982 година.
Егзекуцијата со азотен гас никогаш досега не била користена за извршување на смртна казна во САД.
Егзекуцијата на Смит, потсетува Гласот на Америка, следеше по правна битка во која адвокатите на Смит тврдеа дека државата го користи како „морско свинче“ за експериментален метод на егзекуција што може да ја прекрши уставната забрана за сурово и невообичаено казнување.
Федералните судови го отфрлија обидот на Смит да го спречи извршувањето со азотен гас, а последната одлука беше донесена во четвртокот вечерта од Врховниот суд на САД.