Активен пожар во ловиштето „Јасен“, на терен три хеликоптери
Неколку пожари беснеат денеска на отворен простор во земјава, соопшти директорот на Дирекцијата за заштита и спасување, Стојанче Ангелов. Најкритична е состојбата во ловиштето „Јасен“ на територијата на Општина Македонски Брод, каде огнената стихија со денови не може целосно да се стави под контрола.
„Овој пожар е активен неколку дена. Иако повеќе пати беше ставен под целосна контрола, а на моменти и целосно изгаснат, поради исклучително непристапниот терен некои негови краци повторно се реактивираат, зафаќајќи поголема површина,“ изјави Ангелов.
Во гаснењето се вклучени три хеликоптери – два од МВР и еден од Армијата, како и 15 припадници на специјалните единици на МВР, 26 од Армијата, екипи на ЈП „Јасен“ и тимови од Национални шуми.
Активен е и пожарот кај селото Крапа, во истата општина, но според Ангелов се работи за помал обем и се очекува брзо да биде ставен под контрола. Гори и во близина на скопското село Свиларе, каде интервенира Бригадата за противпожарна заштита на Град Скопје со поддршка од два пинцгауера на ДЗС.
Ангелов потсети дека вчера бил изгаснат тежок пожар кај селото Челопејци во Кичевско, кој претставувал закана за воени објекти и самото село. Со брза реакција на два полициски хеликоптера, еден армиски, два авиона „Ер трактор“, противпожарни екипи и локални жители, пожарот бил целосно изгаснат околу 2 часот по полноќ. На терен сè уште има патроли за да се спречи повторно активирање.
