Ахмети е оптимист: За три до четири години ќе влеземе во ЕУ
Претседателот на ДУИ, Али Ахмети верува дека Македонија ќе влезе во ЕУ за три до четири години. Оптимизмот го сподели на дебатата на темата „Европски фронт“ организирана за годишнината на ДУИ во хотелот „Александар Палас“.
„Јас сум оптимист, секогаш сум бил и ќе останам. Без да се крене белото знаме. Поминавме многу соочувања и тешкотии и постигнавме успешно да ги завршиме важните поглавја и за државата и за стабилноста. Најголемите оптимисти не мислеа дека некогаш ќе бидеме членка на НАТО, но тоа сега е реалност. И големите оптимисти не би верувале дека Македонија како мултиетничка државва може да биде пример за решавање на проблемите.
Ако некогаш сме мислеле дека ќе ни требаат 10 години за членство во ЕУ, сега јас верувам дека за 3-4 години ние ќе бидеме членка на ЕУ бидејќи и околностите се сменија во полза на тоа овој пат да се забрза“, нагласи лидерот на ДУИ.
Според него, треба да се направат уставни измени, а затоа треба да има помирување меѓу сите субјекти што имаат одговороност за судбината на државата.
„Јас мислам дека може да се постигне помирување, да ги стават сите интересите на државата, иднината на генерациите. Нема политички интереси дали ќе победиме на дргите избори…“ порача Ахмети.
