Адем Чучуљ највисоко рангиран кандидат за нов претседател на ДКСК
Адем Чучуљ, актуелниот генерален секретар на Државната комисија за спречување на корупцијата (ДКСК), е најдобро оценетиот кандидат во постапката за избор на нов претседател на Антикорупциската комисија. Тој освои 96,50 поени на ранг-листата изготвена од Комисијата за селекција формирана од собраниската Комисија за прашањата на изборите и именувањата.
Според селекциската комисија, Чучуљ зад себе има значајно професионално искуство во областите спречување на корупција и управување со судир на интереси, како и детално разработена програма за идниот развој на институцијата. Позицијата претседател на ДКСК остана празна по оставката на Татјана Димитровска, поднесена по објавувањето на обвинението во предметот „Адитив“.
На второ место е рангиран Бранко Смилевски од Скопје, дипломиран економист и магистер по антикорупција, кој доби 86,33 поени. Трет е проф. д-р Кимо Чавдар, правник и доктор на политички науки, со освоени 81,83 поени.
Од вкупно 13 пријавени кандидати, еден го повлече своето учество, а двајца не ги исполниле условите, па во финалната селекција влегоа 10 кандидати. Собраниската Комисија за прашањата на изборите и именувањата утре треба да го избере кандидатот кој ќе ја преземе функцијата прв антикорупционер.
