5 од 6 заловени кучиња имаат сопственик – Анима Мунди бара напуштањето да стане кривично дело
Дури пет од шест кучиња заловени од ЈП „Лајка“ за еден ден биле со сопственик, предупредуваат од организацијата за заштита на животни Анима Мунди, нагласувајќи дека ова ја открива суштинската причина за продолжувањето на проблемот со бездомните кучиња.
„Овој пример не е единствениот извор на проблемот, но е видлив доказ во практика. Неодговорното сопствеништво, заедно со дислокација на кучиња и континуиран прилив на животни од различни места, го нарушуваат системот за контрола и создаваат состојба во која е речиси невозможно да се намали бројот на бездомни кучиња“, соопшти Анима Мунди.
Организацијата посочува дека додека ЈП „Лајка“ троши ресурси за заловување, стерилизација и згрижување на животните, нови кучиња постојано завршуваат на улица. Без санкции и без лична одговорност на сопствениците, системот третира само последиците, но не и причините на проблемот.
Во последните 4,5 месеци, додаваат од Анима Мунди, е забележано и организирано префрлање на кучиња од една општина во друга, што дополнително ја продлабочува кризата, особено во Скопје.
„Фактот дека пет од шест заловени кучиња имаат сопственик е директен доказ дека проблемот не може да се реши без строга законска регулација. Потребни се сериозни и доследно применувани казни за неконтролиран расплод, пуштање кучиња без надзор и напуштање животни“, се наведува во соопштението.
Анима Мунди апелира напуштањето на миленик да стане кривично дело, како што е случај во повеќе европски земји, вклучувајќи Хрватска, Франција и Португалија. Иницијативата е доставена до Министерството за правда, Министерството за внатрешни работи, Владата на РСМ и Агенцијата за храна и ветеринарство, а се очекуваат конкретни законски измени и измена на Законот за заштита и благосостојба на животните.
„Животните не се виновни што се на улица. Решението не е нивно убиство, туку спречување создавање нови напуштени животни преку реална и строго санкционирана одговорност. Системот мора да ги спречи проблемите пред да се појават“, заклучуваат од Анима Мунди.
