„5 до 12“ за судството: Собранието ќе носи закон ден пред Нова година, а Судскиот совет „пуст“ – нема кворум за седница
Додека пратениците се подготвуваат за „фото-финиш“ гласање на еден ден пред Нова година, највисокото судско тело во државата е блокирано поради одмори. Ова е парадоксот што деновиве ја одбележува правосудната сфера.
Во вторник, на самиот истек на годината, Собранието треба да го помине филтерот на второто читање и да го изгласа Законот за Судски совет. Како што најави претседателот на Собранието, Африм Гаши, целта на овој закон е конечно да се комплетира составот на Судскиот совет, кој долго време функционира со намален капацитет.
И додека законодавниот дом брза да донесе законско решение во пресрет на празниците, во самиот Судски совет владее „празнична атмосфера“ предвреме. Вчерашната 534-та седница беше одложена бидејќи во салата се појавија само шестмина членови.
Претседателот на Советот, Александар Камбовски, беше принуден да ја одложи седницата и најави дека дополнително ќе се утврди нов датум. Ова се случува во момент кога јавноста очекува институционална ефикасност и расчистување на состојбите во судството, а наместо тоа добива административни паузи.
Потребата од носење на овој закон беше изгласана кон средината на овој месец. Со гласањето закажано за вторник, власта прави последен обид во оваа календарска година да ги постави правните темели за пополнување на испразнетите места во телото кое треба да ги контролира судиите.
