35-ти Марш на ангелите во Кочани: „Време е улиците да зборуваат“
Здружението на граѓани „16-ти Март 2025“ упати јавен повик до граѓаните да се приклучат на следниот „Марш на ангелите“, кој ќе се одржи денеска, на 27 декември 2025 година, со почеток во 14:05 часот, од Паркот на револуцијата.
Од здружението порачуваат дека маршот е мирен, достоинствен и јасен израз на солидарност, насочен кон оние кои ги загубија животите, но и кон сите повредени кои преживеаја и, како што наведуваат, ќе го носат товарот од трагедијата до крајот на животот.
„Ова не е марш за политичари, ниту за медиуми. Ова е марш за тие што ги нема, за тие што преживеаја и заслужуваат вистина, почит и правда“, стои во објавата на здружението. Тие нагласуваат дека целта е да се испрати силна порака за безбедна иднина на сите деца и за општество во кое секое утре ќе биде посигурно од денешниот ден.
Организаторите истакнуваат дека секој поединечен чекор е значаен и дека присуството на граѓаните е доказ дека јавноста не е рамнодушна и дека правдата не смее да биде игнорирана. Според нив, маршот е начин улиците да проговорат за она што институциите, како што велат, го премолчуваат.
„Не затоа што мораш, туку затоа што е исправно“, порачуваат од „16-ти Март 2025“, додавајќи дека секој граѓанин е потребен и дека маршот не е за поединци, туку за сите.
Ова ќе биде 35-ти по ред „Марш на ангелите“, кој, според здружението, останува симбол на граѓанската борба за вистина, одговорност и достоинство на жртвите.
