30-дневен притвор за првоосомничениот во случајот со пожарот во Трубарево, останатите тројца во куќен притвор
Скопскиот Основен кривичен суд го прифатил предлогот на Основното јавно обвинителство и му одредил 30-дневен притвор на првоосомниченото лице поврзано со фирмата каде што во саботата избувна голем пожар во објект за електронски отпад во Трубарево. За останатите тројца осомничени судот одредил мерка куќен притвор.
Основното јавно обвинителство Скопје отвори истражна постапка против четири физички и едно правно лице за кривично дело „Загрозување на животната средина и природата со отпад“ според член 230 став 2 во врска со став 1 од Кривичниот законик.
Првиот осомничен, иако формално не бил управител на правниот субјект каде бил складиран отпадот, реално го организирал работењето, ги извршувал одлуките и бил одговорен за законитоста на работењето на фирмата и подружницата за рециклирање, се наведува во соопштението на Јавното обвинителство.
Истата истрага ги опфаќа и неговата ќерка како соизвршител, која формално била управител, како и тројца други осомничени – овластено лице-раководител на подружницата и две лица кои непосредно раководеле и обработувале отпадот надвор од дозволените простории.
На 13 септември објектот со отпад се запалил, пожарот се проширил на најголемиот дел од складираниот електронски отпад и на објектите на подружницата, предизвикувајќи масовно испуштање чад, пепел и гасови во воздухот. Мерењата на надлежните институции покажале високо ниво на загадување.
Јавното обвинителство нагласува дека продолжува истрагата за потенцијална одговорност и на други лица и се издаваат наредби за обезбедување докази по кои постапуваат надлежните органи.
