232 мртви во ноќен клуб во Доминиканската Република – вака се правда сопственикот

Кровот што се урна во популарен ноќен клуб во Доминиканската Република овој месец, при што загинаа 232 лица, протекувал со децении и бил поправен со гипс картон неколку пати, според сопственикот.

Антонио Еспаилат, кој исто така го води ноќниот клуб „Џет Сет“ во главниот град Санто Доминго, го даде своето прво интервју за локалната телевизиска станица „Телесистема“ во среда по несреќата на 8 април, објави NBC News. Еспаилат му рекол на новинар за „Ел Диа“ дека вработените додале нов гипс картон на покривот неколку часа пред уривањето.

Тој забележал дека гипс картонот паѓал со години од различни причини, вклучително и вода што протекувала низ клима уредите на клубот. Сепак, Еспаилат рекол дека никој никогаш не го проверил покривот ниту ги истражил протекувањата на вода.

„Секогаш сме купувале гипс картон. Секогаш“, рекол Еспаилат со тивок тон за време на речиси едночасовното интервју.

Еспаилат рече дека дознал за уривањето кога неговата сестра го повикала од под урнатините, заробена со стотици други посетители на концертот од саканиот пејач на меренге Руби Перез, кој беше меѓу загинатите.

„До семејствата на жртвите, сакам да кажам, жал ми е. Многу ми е жал. Целосно сум скршен.“, рече Еспаилат.

„Сите бевме изненадени.“

Еспаилат рече дека имал 6 години кога неговата мајка го основала легендарниот клуб пред 52 години. Клубот подоцна се преселил во поранешно затворено кино и останал таму 30 години, сè до уривањето. Тој рече дека на покривот имало шест клима уреди и три резервоари за вода. Генераторот се наоѓал во соседната просторија, а не на покривот, додаде тој.

На секои шест до осум години, специјализирана екипа го водоотпорувала покривот, а последната таква операција била околу еден месец пред уривањето, рече тој.

Тешките звучници во „Џет Сет“, познат по своите забави со меренге секој понеделник, биле на подот, рече тој.