23 српски државјани бараат евакуација од Судан, шансата за излез е нула
Срби се „заглавени“ во Судан каде има воени дејствија. Евакуација од Судан бараат 23 српски државјани, а шансите за нивно извлекување се еднакви на нула. Тие сакаат да избегаат од главниот град Картум. Таму не е безбедно, а договореното примирје не се почитува.
„Од каде да се евакуираат? На тој аеродром нема каде да се слета. Се пука насекаде. Три пати објавуваат примирје до кое не се придржуваат“, вели почесниот конзул на Србија во Судан, Ахмед Муфти за Н1.
Рече дека засега нивното извлекување е невозможна мисија.
„Ги разгледуваме сите можности да ги евакуираме нашите државјани во соработка со другите амбасади и дипломатски претставништва. Во контакт сме со Обединетите нации, Европската Унија, за кога тие ќе го евакуираат својот персонал, да бидеме вклучени и ние“, изјави почесниот конзул.
Аеродромот во Картум е целосно уништен и кон него се пука веќе петти ден. Муфти објаснува дека странците, меѓу кои и српските државјани, генерално живеат во околината на аеродромот кој се наоѓа во центарот на градот. Нема ниту вода ниту струја, а се трошат и резервите со храна, но и горивото за генераторите за струја.
Жестоките борби во Судан се водат меѓу суданската армија, на чие чело е генералот Абдел Фатах ал-Бурхан и паравоените сили за брза поддршка (РСФ), предводени од генералот Мохамед Хамдан Дагало. Двајцата генерали претходно ги здружија силите за да го соборат диктаторот Омар Хасан ал-Башир во 2019 година.
Силите за брза поддршка и суданската војска се натпреваруваат за моќ додека политичките фракции преговараат за формирање преодна влада по воениот удар во 2021 година. По соборувањето на Ал-Башир со Судан управува Советот на генерали. Во судирите досега загинаа 330 луѓе. Алтернативниот грчки министер за надворешни работи Милтијадис Варвициотис призна дека владата на Нова демократија дала дозвола за извоз на нелегалниот шпионски софтвер „Предатор“ во Судан, кој сега се соочува со граѓанска војна.
