17-годишник кој ги убил родителите планирал атентат на Трамп
Седумнаесетгодишник од Висконсин, обвинет за убиство на своите родители, планирал атентат врз американскиот претседател Доналд Трамп, стои во судски документ на ФБИ.
Минатиот месец, Никита Касап (17) од Ваукеша беше обвинет за убиство на својата мајка, 35-годишната Татјана Касап, и на својот очув, 51-годишниот Доналд Мајер, а исто така е обвинет дека живеел со нивните тела две недели. Истражителите сега тврдат дека младиот човек планирал и убиство на претседателот.
ФБИ го обвинува Касап за заговор, обид за атентат врз претседателот и обид за употреба на оружје за масовно уништување.
Според ФБИ, истражителите при претрес на уредите на Касап пронашле „манифест“ во кој се повикува на атентат врз претседателот со цел предизвикување расна војна и создавање хаос.
Екстремистичка идеологија и конкретни планови
Касап ги споделувал своите планови со други лица на ТикТок и Телеграм, а се идентификувал како следбеник на Order of the Nine Angles, група која ФБИ ја опишува како неонацистички култ што „пропагира насилство и тероризам со цел уривање на властите и уништување на модерната цивилизација“.
Според документите на ФБИ, Касап веќе делумно платил за „дрон со механизам за испуштање товар“, со кој планирал да фрла експлозиви, молотови коктели или силен отров врз цели.
„Убиството на родителите очигледно било обид да се обезбедат финансиски средства и слобода потребна за спроведување на неговиот план“, се вели во изјавата под заклетва.
Апсење и обвиненија
Касап бил уапсен на 28 февруари, откако поминал на знак „стоп“ додека го возел очувовиот „Фолксваген Атлас“ во ВаКени, Канзас, оддалечен речиси 1300 километри од неговиот дом во Висконсин. Во автомобилот биле пронајдени очувовиот пиштол Smith & Wesson 357 Magnum, личните документи на жртвите и чаури.
