17 години затвор и протерување за Кадир Кара: Изречена пресуда за убиството на плоштадот во Штип
Турскиот државјанин Кадир Кара е осуден на казна затвор од 17 години за убиството на свој сонародник во кафуле на Градскиот плоштад „Слобода“ во Штип. Освен затворската казна, на осудениот му е изречена и мерка протерување од државата, која ќе се реализира по неговото излегување од затвор.
Одлуката на Основниот суд во Штип следува откако Кара на рочиштето одржано на 19 декември 2025 година призна вина за кривичните дела убиство и неовластено држење на оружје. Портпаролот на судот, Сашко Георгиев, потврди дека пресудата е донесена врз основа на признанието.
Истовремено, во штипскиот суд продолжува судскиот процес за останатите четири лица обвинети за помагање при извршување на убиството. На денешното рочиште беа изведувани докази, а следното продолжение е закажано за 20 јануари во 10:30 часот.
Крвавиот инцидент се случи на 8 мај 2025 година во угостителски објект во центарот на Штип. По извршеното убиство, Кара со помош на другите обвинети се обидел да побегне, но групата беше пресретната и уапсена од полицијата на наплатната рампа на автопатот „Гоце Делчев“ кон Скопје.
