11 полицајци од Кочани осомничени за „Пулс“ го добија МВР на суд
Министерството за внатрешни работи (МВР) преку одговор до Телма потврди дека 11 полицајци, осомничени за пожарот во дискотеката „Пулс“ во Кочани, ги добиле граѓанските тужби за поништување на одлуката за мирување на нивниот работен однос.
Како што информира МВР, полицајците биле ставени во мирување, а не суспендирани, по отворањето на истрагата, поради што немале ниту плати, ниту социјално и здравствено осигурување, иако против нив не било поднесено обвинение ниту имало правосилна пресуда. „Од страна на седумнаесет лица на кои им мирува работниот однос поради мерки на претпазливост поврзани со „Пулс“-Кочани, заведени се судски постапки за поништување на решенија со кои им мирува работниот однос. Во овие судски предмети донесени се единаесет пресуди со кои се усвоени тужбените барања и сите предмети се во постапка по жалба пред Апелационен суд Штип, односно постапките не се правосилно завршени“, соопшти МВР за Телма.
Министерството појаснува дека одлуката за мирување на работниот однос била донесена поради изречени мерки на претпазливост, меѓу кои и забрана за вршење работна задача како полициски службеник, но наместо да бидат суспендирани според законите и колективниот договор, им бил ставен работниот однос во мирување.
Телма исто така известува дека за 13 полицајци поднесени се барања за отстранување од работно место, но МВР посочува дека тие мерки не можат да се спроведат додека трае истрагата. Обвинителството против речиси сите полицајци кои ја добиле правната битка поднело обвинение.
Од нив, 13 полицајци се обвинети за тешки дела против општата сигурност, а девет за злоупотреба на службена положба, бидејќи не извршиле соодветни контроли на јавниот ред и мир и за сообраќајното решение пред „Пулс“, каде во пожарот загинаа 63 лица, главно млади, а над 210 беа повредени. Судскиот процес за деветте обвинети за злоупотреба е закажан за 2 март во Скопје, иако дел од обвинетите сè уште не го добиле обвинението на увид.
