Звезда има криптонит за момците на Обрадовиќ – петти по ред триумф во Купот на Србија!
Ова е петти по ред трофеј во националниот куп за црвено-белите. Натпреварот започна со тројка на Алексеј Покушевски за црно-белите, но противникот брзо го презеде водството. Сепак, благодарение на цврстата одбрана, партизановци ја завршија првата четвртина со предност од 20-16. Во втората четвртина, Партизан ја зголеми предноста на девет поени (29-20), принудувајќи го тренерот на Звезда, Јанис Сферопулос, да побара тајм-аут. Црвено-белите потоа ја подобрија играта, а по клучната тројка на Давидовац, го презедоа водството со 36-35. Во третата четвртина, Партизан успеа да направи пресврт и поведе со 48-47. Сепак, Звезда повторно ја врати контролата и влезе во последната четвртина со минимална предност од 58-57.
Во последната четвртина, двете екипи постојано се менуваа во водство. На четири минути пред крајот, резултатот беше израмнет (69-69). Црвена звезда влезе во последните две минути со минимална предност од 75-74. Во неизвесната завршница, Партизан имаше шанса да победи, но Карлик Џонс погоди само едно од двете слободни фрлања, испраќајќи го натпреварот во продолжение. Во дополнителните пет минути, црвено-белите почнаа подобро, а клучниот момент се случи кога Коди Милер-Мекинтаер погоди за водство од 86-83. Партизан не ги искористи своите шанси во последните секунди, а со забивање на Милер-Мекинтаер беше поставен конечниот резултат.
Со оваа победа, Црвена звезда ја продолжува својата доминација во националниот куп, освојувајќи ја титулата по петти пат во низа.
