Зошто земјотресот во Мароко беше толку смртоносен?
Сеизмичката активност, како што се земјотресите, не е невообичаена во Мароко
Повеќе од 2.500 луѓе загинаа во силниот земјотрес со јачина од 6,8 степени според Рихтеровата скала што го погоди Мароко на 8 септември. Епицентарот на земјотресот бил во планините Висок Атлас, 71 километар југозападно од Маракеш.
Земјината кора се состои од неколку тектонски плочи, кои постојано се во движење. Придружна појава на овие движења се земјотреси, вулкани и постојано преобликување на релјефот.
Земјотресот во Мароко е последица на конвергенцијата на евроазиската и африканската плоча. Нивното движење доведе до формирање на планинскиот масив Атлас, кој се протега низ Мароко, Алжир и Тунис. Епицентарот на овој разорен земјотрес бил токму во планините Атлас.
Судирите на евроазиската и африканската плоча, секако невидливи за човечкото око, предизвикуваат скратување и компресија на планините Атлас, што дополнително предизвикува триење меѓу плочите. Научниците веруваат дека овие раседи биле активни долго време, пред неколку милиони години, пренесува Live Science.
Земјотресите не можат да се предвидат
Земјотресите е невозможно да се предвидат, дури и со сегашното знаење за сеизмологијата. Всушност, многу истражувачи веруваат дека тоа нема да биде возможно ниту во иднина. Она што може да го направат сеизмолозите е да ги утврдат областите каде што е најверојатна појавата на земјотреси. Ова е она што тие го нарекуваат долгорочно предвидување, кое се заснова на знаење за сеизмичкото минато и активните раседи во регионот.
Студиите за сеизмички ризик исто така вклучуваат проучување на условите на почвата блиску до површината и карактеристиките на градбата. Имено, неопходно е овие ризици да се применат во градежната практика.
Сеизмолозите велат дека луѓето не гинат од земјотреси, туку од згради. Зградите кои не се приспособени на сеизмичките прописи и без структурна поддршка се потенцијална опасност во таквите области. Затоа, градежната регулатива мора да биде приоритет и треба редовно да се ажурира. Ова е најдобриот начин да се заштитат луѓето од овие катастрофални настани.
