ЗОШТО „ПЕЛИСТЕРКА“ СЕ НАЈДЕ НА БЕРЗАНСКАТА ЛИСТА ЗА НАБЉУДУВАЊЕ – еве кои правила не биле испочитувани
Компанијата за производство на газирана вода и сокови „Пелистерка“ е ставена на берзанската Листа за набљудување.
Обично на таа листа се ставаат компании кон кои инвеститорската јавност треба да биде особено внимателна, бидејќи кај нив има некоја специфичност која не постои кај другите акционерски друштва.
Такви примери можат да бидат на пример кога за некоја компанија е доставена понуда за преземање, или е во фаза на преземање, или има некои невообичаени деловни резултати и слично.
Додека, пак, во случајот со „Пелистерка“, причината поради која компанијата е ставена на листата за набљудување, е сериозно непостапување од страна на издавачот, со правилата за котација.
Дополнително се интересиравме која е причината за ставање на „Пелистерка“ на листата на набљудување, а информациите се дека се работи за чести непостапувања по однос на правилата за котација на Берзата, што значи дека компанијата не ги почитувала роковите за објава на своите финансиски извештаи, кои ги бара Берзата.
На 31 октомври годинава Пелистерка го објави својот неревидиран неконсолидиран Биланс на успех за првите три квартали од годинава, додека, пак, на 17 ноември беше објавен неревидираниот консолидиран биланс на успех.
Според неревидираниот неконсолидиран Биланс, како што веќе објави Фактор, во периодот од јануари заклучно со септември оваа година, ова битолско акционерско друштво остварило чиста добивка од 484 илјади евра, што е заголемување за 195 отсто во однос на истиот период лани.
Затоа и констатиравме дека одлично се живее и се заработува од полнење на вода и производство на освежителни пијалоци, бидејќи компанијата за првите три квартали од годинава прикажа трикратно зголемување на добивката, или за близу 200 проценти.
Компанијата освен своите финансики извештаи до Берзата немаше доставено и образложение за својот деловен резултат, па затоа треба да се разгледаат поединечните ставки од Билансот на успех на ова битолско претпријатие.
Во првите девет месеци од годинава „Пелистерка“ наплатила од оперативни приходи 5,33 милиони евра, што всушност се приходи од основната дејност на компанијата. Во однос на истиот период лани, тие се зголемени за 6 проценти.
Н.Н.Ф.
