ЗНАМ бара коалицискиот партнер ВМРО-ДПМНЕ јавно да се огради од изјавата на пратеникот и потпретседател на Собранието, Антонио Милошоски
Движењето „За наша Македонија“ побара ВМРО-ДПМНЕ јавно да се огради од изјавата на пратеникот и потпретседател на Собранието, Антонио Милошоски, кој изрази сомнеж за работењето на министерот за правда Игор Филков од редовите на ЗНАМ.
Милошоски во емисијата „Само интервју“ на Канал 5 изјави дека доколку тој би бил премиер, Филков повеќе не би бил на министерската позиција. Тој посочи дека забележал пониски перформанси на министерот во спроведувањето на Реформската агенда во делот на правосудството.
„Сметам дека има одредено потфрлање, но времето ќе покаже. Моето мислење сум го споделил со другите членови на ИК на ВМРО-ДПМНЕ и со претседателот на партијата. Доколку јас би бил мандатар, актуелниот министер за правда не би бил министер за правда повеќе“, изјави Милошоски.
Од „За наша Македонија“ оценуваат дека Милошоски е последниот кој може да држи лекции за правосудни стандарди. „Добро е да потсетиме дека за среќа на сите, тој не е премиер, ниту бил, ниту ќе биде“, рече потпретседателот на ЗНАМ, Павле Арсоски.
Арсоски истакна дека министерот Филков во изминатите 18 месеци подготвил 28 закони, со особено внимание на оние од Реформската агенда, од кои повеќето веќе се доставени до Владата и се во владина процедура.
„Перцепцијата во јавноста треба да ја почитува работата на министерот и неговиот тим. Законите се подготвени, а прашањето за брзината на постапката треба да се упати кон Владата и премиерот Мицкоски, а не кон ЗНАМ“, додаде Арсоски.
