„Зимзоленд“ си работи без проблем, но и без одобрение – општина Аеродром вели внимателно се разгледуваат сите факти
Забавниот парк „Зимзоленд“ поставен на приватна сопственост во Аеродром е предмет на инспекциски надзор од Град Скопје, при што е констатирано дека субјектот нема добиено одобрение за поставување на луна паркот од надлежен орган на Градот.
И покрај констатираната неправилност, „Зимзоленд“ продолжува да работи нормално, без никакви прекини.
Според дописот од Секторот инспекторат на Град Скопје, Комуналната инспекција извршила вонреден инспекциски надзор на 11.12.2025 година. Притоа, утврдено е дека правниот субјект ГЛОБАЛ ИМПАЦТ ДООЕЛ Скопје, кој е сопственик на друштвото за трговија и услуги МЕГА ЛУНА 25 ДООЕЛ Битола, поставил реквизити за луна парк на приватен имот без одобрение од надлежен орган на Градот Скопје.
Со оглед на тоа што Комуналната инспекција на Град Скопје нема надлежност да ги отстрани реквизитите поставени без одобрение, таа побарала од Општина Аеродром да постапи согласно своите надлежности од Законот за градење.
По констатацијата од Град Скопје, градоначалникот на Општина Аеродром, Дејан Митески, информираше дека инспекциските служби професионално и посветено постапуваат во врска со манифестацијата „Зимзоленд“.
Инспекциската постапка била отпочната на 28.11.2025 година, а во моментов внимателно се разгледуваат сите факти и околности, кои се однесуваат исклучиво на одобрението за поставување урбана опрема на оваа локација.
Митески истакна дека земјиштето на кое се одржува „Зимзоленд“ е во приватна сопственост и нагласи дека Општина Аеродром не е организатор, ниту учесник во програмските активности на манифестацијата.
По целосно завршување на постапката, од Општината ќе бидат преземени соодветни мерки согласно законите, доколку се утврди основа за тоа.
Претходно, градоначалникот на Скопје, Орце Ѓорѓиевски, објави дека Град Скопје не издал дозвола за вршење дејност на „Зимзоленд“. Тој, исто така, наведе дека за реквизитите и забавните содржини кои не се дел од програмата на Општина Аеродром, наложено е градежниот инспектор од Општината да постапи согласно законските регулативи.
И покрај инспекциските надзори и констатираните неправилности, од „Зимзоленд“ потврдија дека се вршат инспекциски надзори, но ги демантираа наводите во дел од медиумите дека паркот ќе биде затворен. Како што беше наведено, забавниот парк продолжува да работи со нормално работно време и без никакви прекини.
