Жртвите на поплавите и свлечиштата во Бразил станаа 40 лица

Бројот на загинати во поплавите и свлечиштата во југоисточниот дел на Бразил денеска се искачи на 40, покажуваат официјалните податоци на кои се повикува Ројтерс.

За време на посетата на областите погодени од поплави и лизгање на земјиштето, бразилскиот претседател Луис Инасио Лула да Силва рече дека не треба да има повеќе градби во областите загрозени од лизгање на земјиштето и големи поплави и вети дека ќе се справи со проблемите со домувањето.

Властите во државата Сао Паоло денеска соопштија дека пронашле уште четири жртви, покрај 36-те пријавени вчера. Локалните власти очекуваат повеќе жртви, бидејќи речиси 30 лица се уште се водат како исчезнати.

Лула да Силва заедно со министрите од неговиот кабинет изврши увид во оштетувањето од хеликоптер во крајбрежниот град Сао Себастијао, по што се сретна со локалните власти таму.

Претседателот вети дека ќе помогне во обновата на градот, кој има околу 91.000 жители. Тој вети дека ќе се градат нови домови на побезбедни локации, истовремено велејќи дека владата мора да работи на обнова на клучната инфраструктура, како што се патиштата, кои исто така се погодени од одрони и поплави.