Жолт аларм низ Македонија, има опасност од локални поплави

Управата за хидрометеоролошки работи (УХМР) денеска издаде предупредување од жолто ниво за поголемиот дел од територијата на државата, поради зголемен ризик од локално излевање на реките.

Според објавената хидролошка прогноза, поради тековните врнежи, постои потенцијална опасност од нагло зголемување на водостојот на реките и активирање на суводолиците.

Надлежните апелираат на зголемена претпазливост, особено за жителите кои живеат или се движат во близина на помалите речни корита и суводолиците низ западните и централните региони. Поради заситеноста на почвата од влага, секое ново количество дожд може да предизвика брзо истекување на водата и локални проблеми.

УХМР продолжува со континуирано следење на водостоите и најавува навремено ажурирање на хидроалармот доколку состојбата на терен се влоши.